Maria canta fama e canta gloria
di Berbardu Zizi
Nurallao 15 - 20 agosto 1974 (festa della Madonna della Strada)

Maria canta fama e canta gloria
Has tentu in d'ogni altare beneittu
E cantas lodes ancora ti dana
Pro te in vinti seculos de istoria
Hana sas menzus paginas iscrittu
De paradisu immortale sovrana
Salvese tottu sa genia umana
Eterna mama e su santu messia
Pro su cale penadu hasa e piantu
Dae Betlemme a su monte ‘e Golgotta
Salvese sa genia umana totta
Eterna mama ‘e su santu messia
Salvese totta s'umana genia
Eterna mama ‘e su messia santu
Pro su cale penadu hasa e piantu
De Betlemme a su Golgotta monte
Una istella non b'hada in s'orizzonte
Chi done che a tie lughe bella
In s’orizzonte non b'hada un'istella
Chi done lughe bella che a tie
Sos anghelos festosos d'ogni die
Innos de amore divinu intonana
Sos santos che reina t'incoronana
E ti cantana osanna tottugantos
Diletta fizza ‘e Gioacchinu e Anna
Isbocciada che rosa in Palestina
Sos santos t'incoronas che reina
E ti cantana osanna tottugantos
Reina t'incoronana sos santos
E tottugantos ti cantana osanna
Diletta fizza ‘e Gioacchinu e Anna
In Palestina isbocciada che rosa
De Giuseppe fidele casta isposa
Su modellu de Deus creadore

Maria canta fama e canta gloria
Has tentu in d'ogni altare ecc. ecc.
………..
Innos t'intonan de divinu amore

Bestida in d'unu mantu ‘e risplendore
E a sas altas isferas ses partida
Ue dominas, regnas e imperas
Assunta de su tou fizzu santu
Estida de isplendore in dunu mantu
E a sas altas isferas ses partida
In d'unu mantu ‘e isplendore estida
Partida sese a s'altas isferas
Ue dominas, regnas e imperas
Assunta dae su santu fizzu tou
Has de testamentu ezzu e nou
Ch'has de su chelu sas giannas abertu
Sos autistas a tie hana isceltu
E da oe t'invoccan d'ogni die
Da chin su postu e guida si collocana
Cando percurrene istradas e pistas
A tie ti hana isceltu sos autistas
E dae oe t'invoccan d'ogni die
Sos autistas isceltu hana a tie
E d'ogni tie dae oe t'invoccana
Da chin su postu ‘e guida si collocana
Cando percurrin pistas e istradas
Tra sas festas a tie dedicadas
Nurallau cust'attera hasa aggiuntu
Verginella immortale in d'ogni puntu
Siada de cumpagnia e sentinella
In d'ogni puntu immortale verginella
Siada a sentinella e cumpagnia
Su viaggiante accumpagna in sa via
Beneigas sa idda ei sa campagna
Su viaggiante in sa via accumpagna
Sa idda ei sa campagna beneigas
Manda in favore annadas amigas
Pro su massaiu artigianu e pastore
Manda annadas amigas in favore
Pro su massaiu pastore e artigianu
E faghe chi ognunu a chent'annos sanu
Viva cun sa fortuna sempre in paghe
Chi viva sempre in paghe e cun fortuna
Sas domos lis bisites un’a una
Non nde lasses manc’una ismentigadu
Benes a presidente e committadu
Chi organizzadu hana sa festa
Intantu fino sa moda modesta
Pedinde iscuscia a minores e mannos
Chi m'azzis ascultadu cun passenzia
Zente laboriosa sempre onesta
Custa die Maria a sos chent'annos
Connoscas in santa residenzia
Prima chi lasse sa tua dimora
Cuntentu de m'haer fattu preferenzia
Un'atteru saludu accett'ancora
E bona notte e bona permanenzia.