Maria Ortiche
de Tonino Fancello

Che tripide addromas su‘ochile
fachende mariolas de chisina
a candela allutta in sa cuchina
irvettas s’iscrarire‘e s’impuddile.

Sa sughida ti falat in gattile
e sa brusa t’ispricat che lurina
mal’ispertada che una cottighina
irvettas sa toccada‘e campanile.

E tucas a su riu garrià
chin sa brocca s’isterzu su tittile
e frastimas sa notte ch’est colà.

Chin sa miseria ses sa prus umile
e sa vardetta‘e ortiche ch’est sestà
ti fachet bella in su tempus ostile.

Secondo classificato a Fonni
(Concorso su Sonetto)
25 Giugno 2013.festa San Giovanni Battista