Maripòsa
di Gigi Noce
(Pa no’immintiggà)

Ammèntaddi di me, che maripòsa
chi s' è brusgèndi l' àri a pòggu a pòggu
ma a me ca' m'è brusgèndi no' è lu fòggu .

Ammèntaddi di me, che maripòsa,
chi in gìru a la candèra è bisgiurèndi
e cumènti candèra è cunsumèndi.

Ahi! Maripòsa mea. Tu dùgna nòtti,
ti ni pisàbi, chéna fa' rimòri,
pa' no' isciddà ca' no' era drummèndi,
ed eu, pa' no' isciddàtti, trattinìa
lu pòggu arènu chi mi rimanìa...
cussì, noi umpàri, èrami murèndi.

Cànti nòtti passàddi a mànu ténta,
una mànta lampàdda sobra a l' ànchi ,
pasanèndi di matèssi duròri!

Ma a me no' m' hai vurùddu a accumpagnàtti
e zi sei andàdda sòra, Maripòsa,
la nòtti ...e eu no' v' éra, a cunsuràtti.