Masthru Brottu e la muglieri fea
di Gigi Noce

Pin pin pin pin pin pin.

Era chisthu da sempri lu signari
chi masthru Brottu battìa cu’ lu martheddu
sobra l’incudina di lu frairi
primma di buggassinni lu panneddu

era chisthu un signari chi dizìa
-piglia la pusizioni chi tu sai
poniddi un saccu in cabu e sia caraddu
e no abbaiddammi chi sinno’ so guai-

La pobarina oramai sabìa
chi lu disthinu l’abia fatta fea
più peggiu di lu diauru…brusgiaddu
puru si abìa lu coipu che una dea

Cussì pin pin pin pin dugna manzanu
e ‘ugna manzanu pin pin pin pin cussì
lu fattu no è passaddu inosseivaddu
a lu pizzinnu chi isthazi in butrea

E cussì candu Brottu à ivviaddu
acchì z’è isciddu pa pagà li tassi
pin pin pin pin ripiti lu signari
e poi s’avvia siguru pa l’ischari

Lu giobanottu è già bedd’allisthriddu
e no à zerthu bisognu d’imparallu
fazi la “cummissioni” a naturari
e poi muddu zi torra da l’ischari

La dì addaboi Brottu sempri puntuari
i’ l’incudina batti lu signari
e daghì à fattu lu soritu siviziu
e z’è già iscendi intendi la muglieri:

-Brottu-li dizi- tu sei sempri forthi
ma arimani mi parì un pudreddu
no ài fabidaddu ma pa lu chi ài fattu
no v’è bisognu di nisciun fabeddu-

Brottu cumprendi la masthigganzina
e lu giobanu da la di è ivviaddu
E Brottu?
L’aggiu visthu l’althra sera
e m’è paruddu umbè ramificaddu!

1° premio per la sezione di poesia satirico - umoristica Concorso La Cionfra 2009