Matzone eo so e mi nde vantu
de cussa razza matzonina rara.
A s'aparèntzia parzo unu santu,
a sa mirada parzo unu para.

In creja a dogni missa sempre cantu
e “giugo sa lughe divina in cara”.
A sos interros ando cun piantu
pro chi sa vida mia parzat crara.

Ma cando falat su sole, a s'iscuru,
mi ch'esso a monte a su cantu 'e s'istria,
fusile a pala, cun sa cartucera.

Est tando chi deo cambio sa manera
de conduer sa “santa” vida mia
e totu su chi agato bi lu furu.

Sa die de mes'austu de su 2004