In sa notte ch’arveschet 'a sa die
S’intennet sa 'erveche melianne
Meliat una chi s’est ischitanne
E gai matessi ischitat a mie
Est istata notte notte pasanne
Cantàta cantu han cantatu a mie
Cuccos, istrias, grillos in istiu
Nos armonican su locu natiu

Su sole achet die, est tottu in oro
Su meliare sichit passu passu
Annanne sichin s’annala issoro
Carcuna si la leat a discassu
Sas ispiccas 'itzatas, a decoro
Indeoran che mantu cata zassu
Su ventu leve survat un’orgànu
Sonannelas a issas, che in manu

Su prueragliu mutu achet nue
Ingullinne sas bruntzinas a sonu
Su pastore s’intennet in tottue
Su melodicu sardu paret bonu
L’acumpantzat su voe ch’est in cue
Chi li achet de bassu a intonu
De contra sa 'erveche in su masòne
Mesu oche su ventu e su puzone

Su cantu a tenore leat bolu
Cantanne de s’amore passione
Cantanne de vendittas chene dolu
Cantanne 'e innotzentes in prejone
Su cantu a tenore est su consolu
De chie est amorosu in sa pessone
Su cantu a tenore est cumpantzia
Ca cumpantza li est sa poesia

Su sero a su monte, vrisca aéra
Ne vatit nuscos salitos de mare
Chin isteddos chi dana galavera
Si sichit su poeticu cantare
Sa luna ch’est reina e ch’est lumèra
Che isposa si achet abbratzare
Sa notte est arrivat e su pastore
Si achet da-e bisos dar’amore

Su ocu a bell 'a bell’abbassa frama
Ammutinne su suo ischintiddare
Sa notte lu ninnat che una mama
Chi non s’istraccat de lu carignare
Su cane pasat in mesu 'e gama
Tentanne chie cheret bardanare
S’intennet solamente s’Empireu
Chi Meraculat su colare meu

Pustis torrat su sol 'a manzanile
Mustranne-nos nuraches e biddaglios
Domos de janas e primos cuiles
Uve naschesin sos sardos primaglios
Sos chi trattesin varios istìles
A metzoru de trastes e travaglios
Sos ch’iscriesin semus sos Shardana
Fitzos de una terra Dea mama

In sa Sardigna de sos Battor Moros
Arcanu est dontzi sonu e dontzi sinnu
Si l’ascurtas intennes su tintinnu
De chie hat in petorra sardu coro