Isterrida

Tott’in festa fin sos Cherubinos
cando pro sa prim’orta Sant’Anna
abbratzadu si hat a Maria.

E cantadu han sos Serafinos
in su brassolu una ninna nanna
cun notas de celeste melodia.

A sa futura Mama ’e su Messia,
a sa pius umile criadura,
a sa dama pius alta e gentile
chi connottu hat sa gioja e su drama.

A sa futura ’e su Messia Mama,
e a sa pius umile criadura
de su Messia a sa Mama futura
e a sa pius criadura umile.
A sa dama pius alta e gentile
chi sa gioja e su drama hat connottu.
Sena peccadu e bianca in su tottu
che purissima e candida rosa.
Pro esser Mama, Fiza e Isposa
de totta canta sa Trinidade.

Primu fiore

Pro salvare s’intrea umanidade
fidele cheres sa sorte accettare
su “Sì” est chi nas a Gabriele
in sa domo Nazarena in Galilea.

Pro salvare s’umanidade intrea
fidele cheres sa sorte atzettare
s’intrea umanidade pro salvare
sa sorte cheres atzettare fidele
su “Sì” est chi nas a Gabriele
in Galilea in sa domo Nazarena.
S’unica chi est de Gratzias Piena
s’eletta, sa pius pura, sa pius santa.

Segunda retroga

Tott’in festa fin sos Cherubinos
……………………………….
de sa Trinidade totta canta.

Segundu fiore

E in Betlemme fiorit sa pianta
e sa notte de lughe si colorit
fin’a ch’idu lu hasa in sa rughe
rinnegadu in Gerusalemme.
E fiorit sa pianta in Betlemme
e sa notte de lughe si colorit
e sa pianta in Betlemme fiorit
e sa notte si colorit de lughe
fin’a ch’idu lu hasa in sa rughe
in Gerusalemme rinnegadu.
Ma poi tres dies est Resuscitadu
binchende cun sa morte sa lotta.

Ultima retroga

Tott’in festa fin sos Cherubinos
………………………………
de sa Trinidade canta totta.

Ultimu fiore

Eroina famosa ’e su Golgòta
in cussa punta ’e monte dolorosa
m’a sa Gloria eterna fis Assunta
de s’Universu suprema Reina.
De su Golgòta famosa eroina
in cussa punta ’e monte dolorosa
de su Golgòta eroina famosa
de su monte in sa dolorosa punta
m’a sa Gloria eterna fis Assunta
de s’ Universu Reina suprema.
Pro esser amparu in donz’ora estrema
a chie cun sos males est in gherra
ma torrada ses dae nou a sa terra
pro salvare s’omine ribelle.
Apparida ses a Massabielle
in Lourdes a s’umile Bernardetta
e sa Miraculosa Medaglietta
dadu has a Caterina Labourè,
in Fatima puru has postu pè
nende sos segretos a Lughia
e oe in Medijugorje o Maria
donas sos messaggios a su mundu.
A T’invocare in modu profundu
oe o Mama toccat a mie
a sos chi sunu inoghe custu die
sempre los prottegges, guida e sana.
Onzi maladia che allontana,
onzi dannu, pena, onzi dolore
e onzi annada ch’enzat in favore
onz’istajone siat bundantziosa.

Felice si unat isposu e isposa
cun amore, accordu e paghe
e recuana a domo in modu faghe
sos chi tribagliende che sun fora
onzi minutu ’e sa vida e donz’ora
siat tottu gosu e allegria.

Ma como ch’est sa moda a finitia
de su poeta ch’est de Ardaule
chi hat cantadu a sa ostra presentzia.

Bois ch’isceltu hazis a Maria
pro distinta Patrona ’e Nule
venerada cun tanta riverentzia.

E ringratziandebos de s’accoglientzia
pro sos errores domando clementzia
e bona notte e bona permanentzia.

Nule, su 7 e 8 de Maju de su 2004.