MODA

Isterrida

Soddisfattu fit su Creadore
cando sa creatzione at terminadu
meraviza ’e totta sa natura.
Mancaiat solu unu fiore
chi cun s’impronta sua bi at lassadu
un’isula de isplendida ermosura.
Ue s’accisu sa bellesa sa dultzura
est una vena rara ’e cuntentesa
in dogni monte e adde tantu amena
uguale a su terrestre paradisu.
Sa dultzura sa bellesa e s’accisu
est una vena rara ’e cuntentesa.
Ue s’accisu sa dultzura e sa bellesa
de cuntentesa est una rara vena
in dogni monte e adde tantu amena
a su terrestre paradisu uguale.
Ue tenet pasu ogni essere mortale
de gioia e paghe nde faghet tesoro.
E nois Sardos cun s’isula in su coro
pretziosa ses o cara SARDIGNA.

Primu fiore

Custa terra lassada in cunsigna
che donu ’e lughe de perla fadada.
Ue incantat s’armoniosu sonu
sena b’aer anneu e ne gherra.
In cunsigna lassada custa terra
che donu ’e lughe de perla fadada.

Custa terra in cunsigna lassada
che perla fadada de lughe in donu.
Ue incantat s’armoniosu sonu
sena b’aer gherra e ne anneu.
Ma chi regnet s’amore e su recreu
dae sa culla finas a sa bara.

Prima retroga

Soddisfattu fit su Creadore
……………………………
pretziosa ses o SARDIGNA cara.

Segundu fiore

Cantu luttu e canta pena amara
ti an dadu cun sa dura cadena
che una colonia ornada de tristura
ch’in sa lotta s’ischiavu an distruttu.
Cant’amara pena e cantu luttu
ti an dadu cun sa dura cadena
cantu luttu e cant’amara pena
ti an dadu cun sa cadena dura
che una colonia ornada de tristura
chi s’ischiavu an distruttu in sa lotta.
Però s’anima de su patriota
est restada intatta e vittoriosa.

Segunda retroga

Soddisfattu fit su Creadore
……………………………
ses o SARDIGNA cara e pretziosa.

Ultimu fiore

Dae cuss’orrenda cella dolorosa
bessiche fora in s’era novella
pro isventolare sa Sarda bandiera
e dogni Moro si ch’oghet sa benda.
Dae cussa cella dolorosa orrenda
bessiche fora in s’era novella
Dae cuss’orrenda dolorosa cella
bessiche fora in sa novella era
pro isventolare sa Sarda bandiera
sa benda si che oghet dogni Moro.
E cust’isula iscritta in s’albo d’oro
chi dae su Divinu est beneitta
cust’isula in s’albo d’oro iscritta
est beneitta dae su Divinu.
Ue est tottu sa terra unu giardinu
et esaltat maestosu su Nuraghe.

Dispedida

Fratellantza amistade e paghe
e tribagliu in dogni professione.
Ma sas boghes no intendet sa Regione
de sa miseria chi lu est padrona.
Dimandan su votu pro sa poltrona
nende chi an bella dogni idea.
Ma una orta subra ’e sa cadrea
de nois non s’ammentat nisciunu.
Oghe ’e dolore dae dogni comunu
unu lamentu tristu e sintzeru.
Si sun bocchinde dae su disisperu
e issos pienan sa busciacca insoro.
E o Sardu ammenta chi as unu tesoro
de su limbazu antigu ogalu a fama.

Ca lu as suttu dae sa titta ’e sa mama
e lu tenes in mente cun valore.
E cun ballos e cantos a tenore
de Talìa sighila sa musa
e costumenes chi sun de ornamentu
a s’istile arcaicu e profundu.
Pro chi risultet faru ’e risplendore
e sias o cara terra ’e Ichnusa
cun su Limbara e su Gennargentu
s’ottava meraviglia de su mundu.
Cun-d-un’amore forte e fecundu
andes fiera zente e nde sias digna
d’esser de su populu ’e Sardigna.

Nurachi, 28.04.2013