| Isterrida
Po render a sos posteros
s’idea
Tue puru possedis un’istoria
As lassadu s’impronta in sa memoria
De un’era patida orrenda e fea.
Po sos dirittos tuos in pelea
As affrontadu lottas e cunflittos
Sentza paura de inimigas flottas
Mandande a monte sos disignos suos.
In pelea po sos dirittos tuos
As affrontadu lottas e cunflittos
In pelea po sos tuos dirittos
As affrontadu cunflittos e lottas.
Sentza paura de inimigas flottas
Mandande a monte sos suos disignos
De su sardu eroismu sos impignos
E s’ammentu de s’animu gagliardu
Sos impignos de s’eroismu sardu
Gagliardu de s’animu s’ammentu
In sas oras de su cumbattimentu
Non teniat paura ’e su nemigu.
Primu fiore
Sa Sardigna est famada
in casu e trigu
Che granaiu de Roma fit giamada
Opera de su pastore e su massaiu
Chi l’an de custu onore fatta digna
Famada in casu e trigu est sa Sardigna
Che granaiu de Roma fit giamada
Sa Sardigna in casu e trigu est famada
Chi fit giamada de Roma su granaiu
Opera de su pastore e su massaiu
Chi l’an fatta digna
de cust’onore
Opera de su massaiu e su pastore
Chi digna de cust’onore l’an fatta
Dedita a sas fadigas e cumpatta
Ospitale a personas amigas
Dedita e cumpatta a sas fadigas
A personas amigas ospitale
E cuss’antiga usantzia locale
Finas in custu tempus tenet dura.
Segunda retroga
Po render a sos posteros
s’idea
………………………………..
De su nemigu non teniat paura.
Segundu fiore
As bella ammirativa posidura
Distinta de su mare in s’attrattiva
Cun ispiaggias de imbidiare
Chi non tenen sos mares sa gemella
As posidura e ammirativa bella
Distinta de su mare in s’attrattiva
As bella posidura ammirativa
Distinta in s’attrattiva de su mare
Cun ispiaggias de imbidiare
Chi sa gemella sos mares non tenen
Sos ch’amana sa marina si trattenen
Godindesi s’aera genuina
Si trattenen sos ch’aman sa marina
Genuina godindesi s’aera
Ca proite sa sarda atmosfera
In s’organismu benessere criat.
Ultima retroga
Po render a sos posteros
s’idea
………………………………..
Paura ’e su nemigu non teniat.
Ultimu fiore
Poetas importantes possediat
Chi an lassadu operas brillantes
Est Bustianu Satta numenadu
Chi s’est distintu in operas perfetas
Possediat importantes poetas
Chi an lassadu operas brillantes
Possediat poetas importantes
Chi operas brillantes an lassadu
Est Bustianu Satta numenadu
Ch’in operas perfetas s’est distintu
E d’appretzare est de Mossa s’istintu
Mereu e Montanaru a facca a pare
S’istintu de Mossa est d’appretzare
Mereu a facca a pare a Montanaru.
Dispedida
Tue Nurachi cun impignu
raru
Ti ses disposta cun coro benignu
Chirchende de sas musas su tesoro
Battinde dilettantes da tottue
Nurachi cun impignu raru tue
Ti ses disposta cun coro benignu
Nurachi tue cun raru impignu
Ti ses disposta cun benignu coro
Chirchende de sas musas su tesoro
Battinde da tottue dilettantes
Cun s’ispera chi enzan importantes
Che sos poetas de s’era passada
S’opera ’ostra tantu appretziada
Potat sighire in s’andare
’e sos annos
E a tottu cantos sos iscultadores
Bos ringratzio tottu amada zente
E perdonade sos mios errores
Po cantu che nd’at minores e mannos
Su cumitadu cun su presidente
Ringratzio de sa ’ostra accoglientzia
Saludo a tottus e bona permanentzia.
Nurachi,
21.04.2013
|
