Isterrida

Marianu quartu de Bas-Serra
maridu de Roccamberti Timbora
ant tentu custa fiza Eleonora
vera eroina de sa sarda terra;
at a sos d’Aragona fatu gherra
de sa Sardigna diventat padrona;
cando sa Carta de Logu presentant
b’iat severas leges in relatu;
a sos de Aragona gherra at fatu
de sa Sardigna diventat padrona,
at fatu sa gherra a sos d’Aragona
de sa Sardigna padrona diventat,
cando sa Carta de Logu presentat
in relatu bi at severas leges,
sunt rispettadas personas e greges
non b’at pius violentzias privadas,
sunt personas e greges rispettadas
non b’at pius privadas violentzias,
su Giudicadu est una ’e sas potentzias
in brama ’e genovesos e pisanos.

Primu fiore

Ma issa cun sa ment’e cun sas manos
sa vera istrategia tenent fissa,
paret dotada ’e divina magia,
forte, severa et eloquente;
ma issa cun sas manos, cun sa mente
sa vera istrategia tenent fissa,
ma cun sa mente e cun sas manos issa
tenet fissa sa vera istrategia,
paret dotada de divina magia,
eloquente, severa e forte.
Brancaleone Doria su cunsorte,
potente genovesu, nat s’istoria,
su consorte, Brancaleone Doria,
nat s’istoria, potente genovesu,
ma cand’ est s’amore intradu in mesu
sos odios de prima sunt suspesos.

Segunda retroga

Marianu quartu de Bas-Serra
................................................
de pisanos in brama ’e genovesos.

Ultimu fiore

Sos duos Giudicados sunt cuntesos
e dae Eleonora unificados,
applaudida che legisladora
e istimada dae sos sudditos sous,
cuntesos sunt sos Giudicados duos
e dae Eleonora unificados,
cuntesos sunt sos duos Giudicados
e unificados dae Eleonora
applaudida che legisladora,
dae sos sudditos suos istimada,
dae donzi sardu appretziada
po su leale ispiritu gagliardu,
appretziada dae donzi sardu,
pu su gagliardu ispiritu leale,
fidele a sa promissa coniugale
onorada muzer’e bona mama.

Ultima retroga

Marianu quartu de Bas-Serra
................................................
de genovesos e pisanos in brama.

Dispedida

Attenta a s’andamentu ’e dogni drama,
pronta, decisa in su sou interventu,
istudiande onzi regime nou
po poder render sa zente cuntenta,
in s’andamentu ’e dogni drama attenta,
pronta, decisa in sou interventu,
attenta a dogni drama in s’andamentu,
pronta, decisa in s’interventu sou,
istudiande onzi regime nou
po poder render cuntenta sa zente
de unificare s’isula at in mente
e arborense unu regnu a formare,
s’isula in mente at de unificare
e formare arborense unu regnu
ma cun s’idea sua ei s’impegnu
a su disizu no est arrivada,
colpida da una peste ispiedada
che tantos sardos perdidu at sa vida,
da una peste ispiedada colpida
sa vida perdidu at che tantos sardos;
sos suos eroismos gagliardos
d’esempiu istrategicu e morale
in sa Sardigna ammentamos ancora
anorande sos suos istendardos;
battindeche sa moda a sa finale
saludo a bois e a Eleonora…