Modellos de poesia
di Giuanne Chessa

E torro cun sa mente
a carrela antiga,
ue intendia contos de manneddu,
de antigoria zente
ch’at semenadu istiga
cun dechida paraula ’e faeddu,
e pustis ammentende
sos massajos ghirende
cun juos lanzos e calchi noeddu,
m’ammento giuaglios
e teraccos drommidos in sidaglios.

Torro cun su pessare
a cussa pitzinnia,
ma non banto su tempus ch’est coladu
cha fit de mal’istare,
e puru sa ninnia
cantàda pro pitzinnu ingalenadu,
si fit bona e ditzosa
dulche e amantiosa
sufriat, de su tempus prenetadu,
ca paritzos janniles
fini ispotzos che boidos bacchiles.

Ma lasso in finitia
sos frores de sa rima,
non dia cherrer versos isfadare
e narrer d’arcadìa,
oje no est prus prima
chi fit donzi alimentu’e suorare,
gai sa poesia
lepia che sisia
fit de tennere a mente, e imparare
su modellu froridu
ch’it de bonas paraulas frunidu.

(Torpè 01.10.2008)

Frunidu = guarnito, assortita di colori ecc.