Po cantare a tie prend'e oro
S’aera è serena e istellada
In s'artura non b'at peruna nue

Sas grazias in manos tenes tue
Deus t'ada arrichida de tantos benes
Sas grazias in manos tue tenes
Ca ses naschida de mama e fortuna

Po cantare a tie prend'e oro
S’aera est serena e istellada
In s'artura non ba nue peruna

Dae tottu sas bellas ses coluna
Chi sabia e onesta t'an connottu
Sese columba de sas bellas tottu
In tratu simpatia e in bravura

Po cantare a tie prend'e oro
S’aera est serena e istellada
Peruna nue non b'ada in sartura

Ses divina celeste criatura
Mandada po incantu a su terreste
Ses criatura divina celeste
Po incantu de tottus ses mandada

Po cantare a tie prend'e oro
In s’artura non ba peruna nue
S’aera est serena e istellada

Beneida de tottus e bramada
Pares chi torres sos mortos in vida
De tottus bramada e beneida
Pares chi coghes s’anima de pena

Po cantare a tie prend'e oro
In s’artura non ba peruna nue
S’aera istellada est serena

De ogni virtude ses piena
Colorida de prospera salude
Ses piena de ognia virtude
Colorida che rosa e primavera

Po cantare a tie prend'e oro
In sartura non ba peruna nue
Serena e istellada este s’aera

Ses profumada viola e sincera
Chi s'istima ti curre sola sola
Ses profumada e sincera viola
Chi de s'internu che fura su coro

S’aera est serena e istellada
In s'artura non ba peruna nue
Po cantare a tie prend'e oro

Ses valorosa che unu tesoro
In dogni puntu e fine e rispettosa
Ses che unu tesoro valorosa
Chi ses bianca che candidu nie

S’aera es serena e istellada
In s’artura non ba peruna nue
Pro cantare prend'e oro a tie

Un’anghelu mes benidu rie rie
Aposta po mi aere avertidu
Unanghelu rie rie mes benidu
D'esser benidu po ti serenare

S’aera est serena e istellada
In s'artura non ba peruna nue
A tie prend'e oro po cantare
Si t'apo su riposu disturbadu
Ti prego chi nde sia perdonadu.

(Boroneddu)