Muzere cara, no as ausentu
perdida in chissà cales bisiones
miras sas nues lascas, che masones
truvados dae donzi frina e bentu.

Forsis ammentas cando cantaias
sa cuntentesa tua a boghe istesa,
fis funtana de briu e de bellesa,
sa domo de allegria pienaias.

Cuddu tempus pienu de isperas
s'est fuidu cun tota sa dulcura;
oe cun ojos velados de tristura
miras atesu bòidas aeras.

E ue est cudda lughe chi faghiat
sa cara tua limpia e serena?
O sa mirada de amore piena
e cuddu risu chi m'incantaiat?

Ohi coro de mama, cant'est mannu
su pesu chi in intragnas ti distruet!
Custu suspiru longu chi ti fuet
sinnat cantu su coro as in afannu.

T'istringo a sinu delicadamente,
tue mi miras e nudda mi naras
ma unu risu t'iscanzat sas laras
e m' ispannat su coro ei sa mente.

Aranova 16 de cabidanni de su 2022