Mont'Arbu
di Larentu Pusceddu

Su sero in mont'Arbu morit, su sole baroniesu.
At caentadu die die in Finiscole sas terratzas solianas
e sas candidas renas de sa Calitta e de Berchida, desertas.

S'urtimu raju luchet che isteddu
dae s'antenna fraicada de sa punta Cupetti
e s'istradone de sant'Anna paret una colora dormida.

Ismurinat in su buscu de Grassianu, inue sos pinos de mare
perden su birde atzesu pro divenner umbra indistinta
e sa funtana de Luittu sichit a bundare
e si perdet in s'adde, inue si sun alluttas
sas primas lampadinas de s'ichinu de sant'Efis.

Como s'iscuru est feridu dae sa luche de sa luna,
chi daet a su monte riflessos de nie.
Mont'Arbu cuat in coro gamas assustadas de muvras,
porcrapos zirellos, forrande e catzadores punterande a fura,
cuccos tzinghirinados e istrias alluntzinande sa chena.
Solu sos tirrios de sas toncas disturban su silentziu.

In su cuile de su Bufalu, su craparzu Lulesu sonniat
s'ammorada sola e cheddas de crapitos pro Pasca
e in su dominariu derrutu de sa riserva Gulletti
bi sun galu sas umbras de sos carbonajos Toscanos.

Mont'Arbu cuat in coro secretos, interrados in grutas
chi an afocadu suspiros de dolore,
perdìdos in sos ghinipros intritzados.
Mont'Arbu dominat su mare e dae sa cocorostra sua
su Casteddu de sa Fae paret una domedda de orticu.

Cada arborinu, su primu raju de su sole,
dae oriente, lu donat a tie chi a sa muda
tentas e ascurtas che Deus Anticu.

(Segnalazione - Posada 1990)