Morit unu Poeta!
de Antonio Piras

(in ammentu de Nanni Molinero)

Morit unu Poeta!
Paret in agonia
finas sa poesia,
poberita!

Lèadi sa berrita,
sias iscabiddadu,
unu si ch’est andadu
de importu!

Paret… ma no’ est mortu!
E li tenzas rispetu
doverosu, e afetu
cun istima.

Cadatantu t’arrima
a lu pensare ebbia,
una pregadoria
lu favorit.

Su Poeta non morit!
Cun sos suos sentimentos
bivet in sos ammentos
de sos bios!

Non si sican sos rios
de sa poetica vena,
a sa lena a sa lena
s’abba bundat.

Totucantu che mundat
de sa vida su ‘entu,
s’òmine de talentu
non lu tocat!

Ràndinat e fiocat,
Deus lampat e tronat
ma cudda rima sonat
armoniosa.

Che funtana ispantosa
falat a ticu ticu
da s’antigu limbicu
lussurzesu.

S’òmine s’est arresu
a s’umanu peleare,
ma non sensat de ‘utiare
cudd’isceta…

“Premiu ispetziale de sa giuria” – XIV Editzione – Santu Lussurzu, 05-10-2012