MORRERE FAGHET MALE
Luisa Scarpa Chessa

Su morrer a dognunu faghet male,
ma su viver a bortas m’assuconat,
timo su temporale cando tronat,
lampos de fogu de s’istadiale.

Istìmo su ‘eranu geniale,
su clima sou chi bene nos donat,
med’istìmo sa zente chi perdonat,
su cristianu veru cordiale.

Amo sa paghe, sa sinzeridade,
prego pro chi’est poveru e afflittu,
sento pro custos caros piedade.

Prego pro zessare ogni cunflittu,
su c’addolorat custa umanidade,
a s’ojanìa c’amat su profittu.