Muttos de saludu
de Antonio Piras

Acollos sos turistas:
sas usansias antigas
bogàdelas a pizu.
T’iscrio duas rigas
ca nde so’ in disizu
ischire coment’istas.

Cando falat su sero
sa die a finitia
istudat su lugore.
Serrada siet sa via
de s’umanu dolore,
in bonu sias, ispero.

Da-e tempus remotu
su càntigu a tenore
oe puru est in usu.
Ti sient a favore
Maria cun Gesusu
e-i sos Santos totu.

No’ mi creo de sos mannos
iscrinde poesias,
no’ l’intendo su pesu.
In salude chi sias,
da sos males a tesu
finas a sos chent’annos.

Po abarrare reu
mi apodero forte
in custa muta ‘e crisi.
Cun sa tua cunsorte
retzas, caru Luisi,
custu saludu meu!