Nademi chie seo
di Nanni Murtas

Pretesa manna foltzis est sa mia
si a fagher preguntas mi arrisco,
pro chi mi finat custa presonìa.

Basta! Como pius no mi afrisco
in sa presone de su no ischire
e cherz'ischire cosas chi no isco.

M'ispozo de su meu presumire,
poi frundidos cuddos betzos pannos,
che alimusineri and' a pedire.

Novas mias noales, e de annos
passados, sas preguntas las impreo
però sentza mi fagher contos mannos.

Deo, cunvintu semper d'esser deo,
Sos chi l'ischin risposta mi nde dien
e mi nelzan abberu chie seo.

In sa figura mia ite 'ien,
mi lu nerzan, ca est essentziale,
sos seriosos chi non si nde rien.

Garanto ca no mi nde paret male,
cale siat chi siat sa risposta;
bos prego de mi dar' unu signale.

Si sa conca la porto tropu tosta
e tribagliosu m'est su pensamentu,
est naturale, no est fat'aposta.

Mi rispondides in custu momentu
totu sos ch'azis un'intelligentzia;
bos prego, dademilu su cuntentu.

Prima de che finire s'esistentzia,
faghidemila custa caridade,
pro mi ponner in paghe sa cussentzia.

Non tenzedas peruna piedade,
nademi totu su chi mi merito,
chie so veramente, mi lu nade.

Bos ap'a esser gratu, lu promitto,
si mi dades sa man'in tal'impresa,
sol'a bos esser gratu mi permitto.

Cherio tenner solu siguresa,
siat ispina o siat ambaghe:
ischire chie so est sa pretesa

e sos sentidos mi ponner in paghe.

Segnalazione di merito al "Quartucciu 2011"