In ojos de amore,
in sas pupias tuas,
cun isteddos de oro
chilco manzanos lughidos de ispera:
e in issas, dechida,
cumpanza de sa luna,
chi ti carignat cun rajos sulenos,
in meries lughentes
s’ispijat a porfia
custu coro.

Su meraculu este
Cando miro s’intragna chi t’alluet,
ca fitina astringhes,
in s’umile pessone,
verzeris pastinados de fiores.

Mai pensas a tie,
e ti cres fortunada pro esser bia,
lastimende continu
a chie no at alas de anghèlu,
a sos toppos chi punghet
donzi ispina.

Non photo , naras tue,
non photo prus gosare dies giaras,
si tristas custas nues,
nieddas de ambaghe
ammantana sas animas de mundu.

Pobera umanidade,
isplican sos sentidos
chi allattas galana a intro ‘e sinu,
poberos frades bonos,
e poberos buzinos
bois puru.

De totus ti nd’appenas
Prenda mia donosa,
mustrende crudos sinnos de rezelu,
e in s’ora su ‘entu,
in undas de apentu
‘olat gighende sos disizos tuos.
In ojos de amore.
Una die una vida

Menzione verso sciolto - Premio di poesia “Tiu Finu” - Romana 2014