Narrere ti cherio
de Gian Gavino Vasco

Nàrrere ti cherio
de su ch'apo imparadu
in custa vida mia ch'est fininde,
fizu chi ses naschinde
e ch'in su mundu 'intradu
ses cun isperas ch'in ojos ti bio.

Tempos de frioleras
t'isettan in sas dies
chi s' 'eranu regoltu at po a tie,
e donzi astrau e nie
attesu ancora 'ies,
imbuccande sas tuas camineras.

Ma ti cherio nàrrere
chi custu chelu nettu
cuat onzi minettu e donzi nue,
e su ch'isperas tue,
ch'in coro as in isettu,
in cust'aera podet iscumpàrrere.

E cun sos ojos mira
sos chelos piùs nidos,
làssache attesu òdiu e fele,
po chi durches che mele
ti nascan sos sentidos,
e mai ti che let sa mente s'ira.

Deo non t'ap' a bìere
cando mannu as a èssere,
ca custu sole meu est tramuntande.
E como so proande
calchi versu a intèssere
po te, chi mi das gana de iscrìere.

1^ classificata – Sezione A poesia in rima - del Premio Poesia “S. Antoni de su O‘U – Mamojada