Naschimentu - Frinas d’amore
de Franceschino Satta

(A Diegu Puddu)

Gando in su muundu naschit unu fizu
sa natura diventat prus bertera.
Palan dae su chelu a galabera
rajos d'amore, càndidos che lizu.

Mama tua, d'affettos dispendera,
ti pintat intro ‘e coro una desizu
chi juchet de su sole s'assimizu
chi bolat durche in àgheras d'ispera.

E pro tene, deddè’ sun sas moìnas
ch'in domo tua,a sero e a manzanu,
t'imbentan chin sas alas de su coro.

Un'alipinta intregat a sas frinas
sas notas d'unu cantu soberanu
chi ti laccheddat in casteddos d'oro.

Nùgoro, su 6 de Santu Gabinu de su 1985