NATALI
(poesia vincitrice del terzo premio al concorso "Lungoni" 2006)

A li stélli lùccichi
s’aùnini in gjócu
dulci schinchiddi
chi da lu fócu
pàltini
cilchendi libbaltài.
Un ventu licéri
li polta pa’ maìa
veldi lu céli…
e iddi si cùrrini
e si pàldini,
si sìghini
e s’allàlgani,
pal basgiassi dilicati
pói, candu si tòrrani.
Cussì mattessi
li pinsamenti méi,
da li prufundi
agnati di la ‘iritài,
bramani lu céli
in chista notti
chjara di Natali,
in chista notti,
pa’ umbè,
amara e frita,
undi lu córi
è un pugnu di gjélu
e undi pasci, matrona,
la sulitài.
Cìlcani luci,
alta cumpagnìa,
pal dividì la paci,
l’alligrìa,
palchì nisciunu
aspittendi lu Bambinu
pòssia pricà da sólu
e la so’ gruci
àggja, pa un pocu,
a disviàssi.

Gianfranco Garrucciu