Aeddademi montes chi azzes bidu
dazzemi novas chi an cancelladu
nazzemi su chi fimus in passadu
de sos sardos s’issoro disaura
de sos mares mudados in crejura
contade tottu su c’amus suffridu.

Nazze funtanas sacras veneradas
contade de sas abbas chi azzes dadu
de sos viles chi bos an cuccuzzadu
pro cancellare intragnas fieras
chi ispartas sun volenne in sas aeras
aspettanne de fizzos sas torrada.

Ninniade d’onz’anima derrutta
chi pianghete e chircat ancora
ischidade sos coros custa est s’ora
de s’aurora pro sa sarda zente
corazzu dali e iscrara sa mente
de piantu sos chizzos lis assutta.

A chie mancat a chie est lontanu
unu saludu de coro l’ imbia
pro chi ancora sa terra natia
a issos dette su chi est mancadu
cumpenset donzi fizzu isfortunadu
a issos nos ammenta fittianu.

Cessa su teju e cantami a tenore
Cathones de orgogliu e allegria
torra in palcu sa sarda poesia
ca no sedimus tottu a l’ascurtare
venza su ventu faghelu pessare
pro che piccare tottu su dolore.

E tue sarda rima custu mantu
azzuda a fizzos tuos a truncare
a corfos de ottavas de cantare
manna sinzales in sa Sarda aera
in d’onzi istrada in donzi carrera
sa limba torret a non dare incantu.

Inoche non jocamus sas isperas
de torrare a su c’an canzelladu
cuddas de jajos c’aian cuvaadu
e oje diventadas sun chimeras.

Capidanne, 2014