Ispreadas a dolu
sas voches de sa zente
in mare s’arzan chircanne ‘e volare
est sufertu su volu
chen’ alenu niente
a terra arrivat s’issoro penare
sas isperas lassanne
ca umbe sunu annanne
no est bagaliu de poder leare
sos corpos arrimados
in sas ispundas sun totu imbolados

Umanidade ofesa
de afetos feridos
sono in sas barcas faladas a funnu
s’anima issoro resa
sos isetos finidos
in su mudore de totu su munnu
no intennes piantu
in cussu campusantu
d’abba salida in su mare profunnu
nemos at piedade
pro custata ismentrigada umanidade

Onzi paghe negada
ofesos chene lughe
onzi assimizu e vida est canzelladu
onzi ispera sicada
a pedes de sa rughe
giamenne est su dolore ammuntonadu
cuddu Deus mutinne
chi lassadu at morinne
de amore su sinzu immaculadu
non vinchet isse galu
s’odiu e s’abbandonu pius malu

Maju, 2016