Ninnanneti in su mare lucorosa
Nche colas a mi dare sa novella
Tue l’attristas sa nott’iscurosa
Macari de su chelu ses sa bella
Su mare ninna' tristu atera cosa
Ma luna non ses tue cara prella
Danneli selénu s’urtimu adíu
Su mare ninna' mortu unu pipíu

Lu sonana sas unnas un’attitu
Lu cantan sos isteddhos attristatos
Su chelu de sa morte s’es' sapitu
E pranghet innotzentes disterratos
Su prantu irmanni' su mare salitu
Ninna 'e mortu pro irfortunatos
Su chelu vrittu murmurà' tittía
Su mare ninna' morta una pipía

Solu su mare ischi' chi sun cue
Chin su chelu tintu a lutt’attristatu
Pro cussu sos isteddhos lis allue'
Che cheros in campusant’ammutatu
Non torran e non lompen a neddhue
Pìnnicu su naviu est affungatu
Poveros cristos oco martirizu
Postos in Ruche che-i Santu 'Izu

Paritzas animeddhas mai cantas
Ninnian in sa losa de s’isetu
Tra unnas e 'unnales sunu tantas
Attitatas in su mortale lettu
De chie sunu e chie la s’ha' prantas
S’ingullitu es' vinas s’urtim’affettu
Chie lis ache luttu e acunortu
In s’ora trista de ninna 'e mortu

…Su mare ninna' mortu unu pipíu
Su mare ninna' morta una pipía
Su chelu vrittu murmura' tittía
Danneli selénu s’urtimu adíu…