Ninna, pilos de tricu
di Larentu Pusceddu

Ninna, pilos de tricu,
in sa cara candida che nie
ti luchen sos ocros de crapola
e sas nadica moes che pruddera ibada
ch'idet acurtzu a issa, s'istallone
a nastulas aberta dae s'istintu.

S'allorican sas coloras,
s'arritzan, s'abratzan, si torulan,
che a nois, in su buscu,
inue fozas punghijolas,
impiedosas, sa carre nos arrancat.

Duas bardufulas isterridas,
paren sos sinos tuos, de rosa nuscosos,
minudos che arantzos premedios.

Ti sun postos sos rujores,
chi de bellesa sun sinnos,
e tando, birgonzosa,
s'eden tuo m'as fattu ammirare.

Ca teneresa m'at donadu cussu zestu,
sas lavras tuas, de corniola, apo sutzadu,
che ape famida, durche mele.

Ti surcat unu riu,
chi si firmat in su mare,
ammantadu cun seda dilicada,
chi permissu non mi so de iscucuzare,
mancari atireret possente sos carignos.

Ma una cras apo a isuliare
sa carre via, ch'in corpus m'est naschida,
in su misteriu de sos abissos tuos.

(3° Premiu - "Tiscali" Durgale 1998)