No mi tudis cussu cantu
de Teresa Piredda Paoloni

Tengu cosas de ti nai
ma non bolis ascurtai
e ti fuis
sparranchendi s’enna a nuis
chi non funt ‘e beridadi
libertadi
chi t’incoscias a sa nua.
In sa pressi de sa fua
non t’acatas
ca non funt mai baratas
i’cinciddas, cand’arruint
non si fuint
funti puntas acutzadas
e t’abarrant sinnadas
po sa vida.
Afruntadda sa partida
ma non gioghist a sa sola
in sa scola
de su campu fatu lisu
candu soli e paradisu
fusti tui.
Stentadì ca est ingui
cussu tretu ancà ti frimas
candu stimas
totu s’èssiri chi seu
nendimì ca tui e deu
seus alas.
Poi anant’’e is oras malas
dònnia bòlidu mi storras
e t’acorras
in sa corti ‘e sa mudesa
presoneri ‘e s’artivesa
chi non mudas
e sa fàbula ndi studas
e de i’ làvunas s’arrisu.
Cali bisu
bivit po srobiri prantu?
No mi tudisti su cantu
chi mi pascit
ch’est inguni ch’issu nascit
sempri inguni ch’issu frorit
e non morit.

1° Premio ex aequo alla XXI Edizione del Premio di Poesia sarda “Remundu Piras”
VILLANOVA MONTELEONE – 25 Agosto 2012