No tucchèddi a Piazza d’Itaria!!!
di Gigi Noce

Canti ginòcci chi m’aggiu imbucciàddu
giugghèndi a pissighìzzi, in pizzinnìa
e canti botti poi ch’aggiu frazzàddu
i’ l’azza e fara...Ahi chi marincunia!
Canti volthi chi soggu lisciggaddu
passendi cu’ li botti di caucciù
i’ lu pamentu ch’abìani ciambaddu...

Abà hani dittu chi....
Mi! No tuccheddi a Piazza d’Itaria!!

Vi so vurùddi sédizi passoni
pinsamintòsi assai pa prugittà
la nobiddài
genti isthudiàdda assai, di gran tarèntu
chi voni dàzzi “la moderniddài”

Dui rocci o quattru v’ha pogg’impurthànzia
chi luzi manna podarani fà...
Semmu noi macchi
o seddi voi cu...ggoni
no lu sabeddi chi a Sòssu so ridendi
chi in casa v’hani li nosthri lampiòni?

Seddi disthruggidòri e frazzadòri
di li dinà di dugna contribuènti!
No v’abbastha ciambà chissi mattoni
“groghi”,
chi so curori di “cani fuggendi”?

Puniddi menti a me chi soggu anzianu
feddi un bedd’impidràddu di trachìti
e si turrèmmu in piazza tuttigànti
a frazzà botti fendi l’azza e fara
gran luzighènti abar’a dibintà
e lu chi aurremmu lu punimmu a un’ara.

Masthru Gì