NOIS FIMIS SIRVONES DE MONTAGNA
(Sos sonadores)

Assegus de sa gianna, ‘e sas ventanas,
mezus bos nde restade a ficca fatta…
nois boltamos sos caddos in ranas,
su trigu regadiu in armuratta…
nois buliamos s’abba ‘e sas funtanas

cun càlamos de ruos e prunitzas,
sos betzos da’ sas roccas ch’imbolamos…
a sas bajanas sas lùghidas tritzas
in pìberas de pighe li giambamos
pro chi ‘enzan che sùrviles raspitzas!

Attesu bos nd’istade in ausentu!
Addae… addae! E sas cantones
ch’in bóidas tilibbas at su ‘entu
frusciadu cun àrridos pumones
in séculos de fura e d’arrebentu

lassàdenos cantare ‘alu un’iscuta!
Nois fimis sirvones de montagna
catzados da’ sa tana a coa allutta;
non timiamis astrau o siccagna,
ne de milli iscurtones sa combutta!

Fimis astores cun alas de gosu,
crabolos inganidos de dultzura,
abba currente, fogu portentosu,
pedras fattas a domo in donz’altura,
istàtuas de brunzu lumenosu!

Abboju fittianu ‘e chelu e terra,
raighinas e chimas tott’a unu!
Mill’annos chen’ischire ite fit gherra,
chen’impeleu o nogher a niunu…
finas a cando, a s’inzerra-inzerra,

non bidemis cun rodas de paone
dae mare accostàresi una nae…
e un’àtera infattu, che matzone
coibàscia e malfusa, pagu addae,
gàrriga ‘e bascaràmene ‘e Sidone!

Allughinzemis sas turres… sa corra
in chentu e prus trighinzos la sonemis
che muscados currinde a s’anda e torra!
Una jana, addaghi nos reunemis,
colpendéndesi a punzos sa pettorra

nos est appresentada pilisolta
detzisa abboghinende:-Los catzade!
Si bi lis permittides una ‘olta
pius mai azis aer libertade!-
Pro mancante la lemis… e regolta

non l’amos cussa ‘oghe de lamentu!
Fattesit una ficca in cara a tottu
e si ch’’olesit paris cun ‘entu!
Dae su die nde lupos connottu
ferotzes e lambridos nd’amos chentu,

ne resessimos a nos la catzare
dae subr’a sas palas sa mattenna!
Addae bos nd’istade a iscultare!
Arroghidas cantones de cundenna
su sas chi bos devimos intonre!

Nois fimis sirvones de montagna,
astores mannos, lìeros crabolos,
non timiamis abba e ne siccagna,
ballaimis a sonu ‘e piccarolos!
Oe in coro sa Morte amos cumpagna!

Antoninu Rubattu