Non fit debile fiamma
di Vittoria Calzaghe

Pensende non reposo unu momentu
E sonniu ogni die amore invanu
Che lughe chi s'istudat pianu, pianu
Lassendemi su coro in turmentu
Debile fiamma giutta dai su entu
Che foza entulende già lontanu
Ma finzas chi la ido arder'ancora
Ti penso notte e die a dogn'ora.

Sempre pius vana e s'illusione mia
Cha sa candela ormai es consumende
Niedda dai su fumu diventende
Istudende sa lughe chi fi bia
Cun issa es finende s'allegria
Cussu fumu su coro iscurighende
Poi istudada restat chera solu
No happo né isperenzia né consolu.

Però su coro in petus palpitende
Currid'umpare cun su pensamentu
A su minutu suni pius de chentu
Sos batidos chi a tie sun giamende
M'avisan cando a mie ses chirchende
Custu coro non lesses'in turmentu
Cuss'ispera non fetas istudare
Cha senza te non potò pius istare.

Ammentadi amore isconfinadu
Chi debile non fit cussa fiamma
Pro te peldidu happo istima e fama
No isco pius'inue happ'aprodadu
Dae cando tue s'amore mas negadu
Non resesso agatare pius sa trama
Cha in subugliu as postu custu coro
Torra ti prego, torra chi t'adoro.

Non mi lesses'andare a sa deriva
Senza te in su mundu e ite fatto?
Sempre giamo, ti chirco non t'agato
So in altu mare ma non bido riva
So marinera ma de remos briva
Sola in sa tempesta eo m'agato
Agiuami arrivare a su portu
Si cust'amore ancora no es mortu.