Non frastimes su ‘entu
di Giannetto Lapia

Cantas bortas happo intesu:
“malaithu siat su ‘entu!”
Medas.. fortzis fintzas troppu.
A rejone o in tortu, sos prus non ti cheren
e medas ti frastiman.

Ma si tue, Entu, amigos chircas,
ti cherzo, ti difendo e ti happo a bantare.
Naras bene tue, diffidente:
“pro nudda non si faghet nudda”
Ithe dia cherrer dae te?
No es meda, pro te, ma no es pagu pro mene.

Isparghe sas àeras tuas maestosas,
brinca ogni malesa, ischinas e baddes
de Montiarbu e s’Ortobene.
Si t’aboghinan, ti pregontan o si ti cheren firmare,
non tzires e mantene in coro tuo s’imbasciada.

Supera sos muros de cussu locu de pena *,
inue sos omines non poten e fortzis non los depent
mancu brincare. Cola tue detzisu,
ma non fruschies in mesu sos ferros
de jannas e bentanas: chirca in tottue a Babbu Meu!

Baida, isse es grussu, non arthu,
bonu de cara e chin sos pilos de pratha,
inghirialu intundu chenza presse e chin grabu deghidu,
fagheli unu carignu pro me!

Si una lagrima l’ides in sos ojos gattinos,
non la lessas ruere! Tue, delicadu,
pìgala chin attenzione e mantenila in coro.

Bessinche pasidu e, attentu ista a non la perdere.
Pone cussa lacrima benenitha in sas manos meas
e dassamila basare, comente faghiat isse cando fia minore.

E tue, Entu, chi ses torrau intundiandemi cuntentu,
grassias de m’aere illeviau sa mente istracca,
canta solu pro me in custa notte serena.

E d’aoe, appo a narrer: “Malaittu chie frastimat su entu”.

* Badu ‘e Carros