Non mi contas prus nudda…
di Giovanni Piga

(A babbu)

Non mi contas prus nudda a serentina
de sas predas de sole in su crapile,
de sos passos notturnos chi s’ormina

non dassaban in grina ‘e manzanile,
de sos betzos attitos ch’irgranaban
coronas de minditta in su fochile…

de sas umbras–pantarmas chi tuccaban
su denotte, chin passu prepotente,
e sa pache in sos coros pilisaban…

Mi contabas de janas de padente
ninnieras d’arbèschias joculanas
allughèndemi isteddos in sa mente,

de su mùrmuru arcanu ‘e sas funtanas
ch’iscurrian in bena ‘e sos granitos
che carinnu ‘e dies solianas.

Sos pessos meos bolaban a pitos
de chelos de ispantu, disizosos
d’ingranire sos sònnios beneitos.

Cussos cussizos tuos lucorosos:
ghias d’assentu, in nottes de traschia
pro sos ispramos meos ispinosos,

m’han intèssiu d’incantu, in sa nadia,
istajones de àndalas sicuras
chin frogheddas d’ispera e poesia.

Oje so’ mannu, prenu ‘e paguras
ca non bio in s’ocru ‘e su benente
pro sos fizos lucore ‘e bonas uras.

Forzis debbadas est chi mi turmente
ca su tempus non mudat su destinu
a sos lamentos surdos de sa zente.

S’oriolu est semper in caminu
che pràdiche parau a cada passu
gramuzande ‘e sos zovanos su tinu:

mancari parjan tempos de ispassu
e de pane bundante in cada domo
in su coro su risu: est risu frassu.

No, no est pro bezzesa, si non dromo
est su pessu ‘e unu cras prus serianu
pro sos puzones impilinde como

…chi bolande mi sun da-e sa manu…

1° premiu assolutu a su cuncursu “Don Salvatore Merche” de Oroteddi, capidanne 2005