NON MI NEDAS PRESUMIDU!
(A Nerina Nieddu)

O Nerina, Nerina...” e-i s’ammentu
curret a s’’ajanedda disdicciada
ch’at Leopardi mannu immortalada
cun versos d’amorosu sentimentu!
Nerina, Sìlvia...mùsica biada,
poéticu armónicu istrumentu
chi l’at dilliriadu notte e die
a un’istudenteddu che a mie!

E si m’est cussa rara poesia
a tales in su coro, in su cherveddu
imprimida da-e sa pitzinnia,
ch’in bula si m’attogat su faeddu
pensende a it’est sa Musa mia:
tùnciu arroghidu d’unu poeteddu!
Bolare dia cherrer in s’aera,
ma sas alas chi gitto sun de chera!

E si, che un’Ìcaru attrividu,
a boltas tento alturas solianas,
non mi nedas, bos prego, presumidu...
sas chimas de su sole sun lontanas
e débiles sas alas, moddianas,
de custu parabàttulu ispilidu!
E puru...intr’’e su coro, a toccheddu,
mi mùidan sos bisos de piseddu!

E...curro tando, sàltio che zigante
peri montijos, baddes, mares, rios!
Su pore non mi mancat, ne sos brios...
e chie si mi parat a innante
cheret chi s’imbenujet a pes mios!
So s’Eroe, su Re prus importante,
Mere ‘e sa vida de chentu persones...
de maicantas mizas...de miliones!

Ma cando torro a domo e...sa Reina
cun carignos mi frobbit su suore,
che Luna noa, nódida, divina
si m’accerat prus ténneru s’Amore!
E tando...so poeta de valore...
e torrat Sìlvia e torrat Nerina
a m’allegrare che janas de oro
e m’ingaleno in su sinu insoro!

It’ammaju! It’accisu ‘e poesia!
Nde resta, o dulche Musa, consolada!
Ma mancu s’est sa Luna barigada
ch’isvanessit s’incantu, sa giaria!
O ànima restada in pitzinnia,
prit’est -mi nara- ti ses ischidada?
E cale pro a mie mezus sorte
su bìvere dromminde che in morte?

Ohi triste infelitze poeteddu,
attesu ch’est su sole pro a tie!
Su fogu chi disizas notte e die,
chi ti brujat in coro, in su cherveddu,
illusione est ebbia! Est solu nie!
Ti nd’esseras restadu istudenteddu...
Ma, sende in su ‘eranu, non podias
connoscher de s’ijerru sas traschias!

Antoninu Rubattu