Non mi nies chi nono
di Larentu Pusceddu

Non mi nies chi nono
si ti pedo s'amore chi disizo.
Non mi facas intender
che foza allepizada
de arbore cuadu a sa luche
o che raicrina arridada dae su sidi.

Perdìdu m'intendo in coro meu,
cando t'ido figura ammaliadora
chi a sa mirada tua su sole s'incrunat
e sa luna si cuat, aturdida.

Tue ses s'ermosura
chi sa natura perfeta at partoridu
pro ponner sas imbenas mias in avolotu.
De cada bisu meu, mere ses tue
pro sos disizos ch'iscrapas…

Chena prus cadenas, liberu m'acato
de retzire sos carinnos tuos
E de godire cando isulio sa vida
in sas intragnas tuas alluppiadas.

Cando ti biso mi miras
cun ocros luchentes e maduros,
cuddos ocros chi surzis
cando intro de te m'imbergo…
In tecus acato su cuerru
chi mi sarbat dae sa solidade
e dae cada temporada
chi sa vida mi daet pro turmentu.

E chena de tene, chena s'amore tuo,
s'esistentzia diat esser dies boidas.

(Menzione d'onore - Villanova Tulo 2004)