Non morit s’ispera
di Salvatore Ladu

Ite confusione
Chircande sa resone
De prite su cherveddu est a passizzu
E su coro a toccheddu
In pettorras nigheddu
A sos isteddos pedinde cussizzu
In continu interrogu
Senz'agattare rispostas in logu.

Eppuru frequente
Intendo da sa zente
Chi s'iscuru sa lughe at canzelladu
Su zustu triunfende
E s'odiu perdende
Su demoniu bintu e cattigadu
Su cane traittore
Umiliadu cun attas d'amore.

Che pandelas, che pramas
Fizas de bonas mammas
Intrizias in ruos de cresura
Senza poder resessere
A filare e a tessere
Cun tramas d'oro in s'andala segura
Perdende sa puresa
Su bene pius mannu, sa ricchesa.

U'est s'orgogliu antigu
Chi frade l'est s'amigu
E s'anzianu babbu e cussizzeri.
Chircade 'e bos frimmare
Un'istante a pessare
Chi s'omine est in mundu passizzeri
Cun su donu 'e sa vida
Dà pro la viver su pius pulida.

So sempere a disizzu
De idere a passizzu
Copieddas a risu a s'abbrazzetta
Lughende che isteddos
Promitindesi aneddos
Ispricandesi in giunta 'e abba netta
E bisante unu frore
Chi siat fruttu innidu 'e s'amore.

Ma non morit s'ispera
Chi siat passizzera
Sa nue ch'est in coro a saettare.
Cras potta solu iscrivere
Crobbas chi fattan riere
E senza entu pasidu unu mare
In giustissia e paghe
Pro custa amada terra 'e su nuraghe.