Non penses a sa losa
di Larentu Pusceddu

Non penses a sa losa
che a una perca iscurosa
inue ti mancat su respiru.
Issa est unu banzicu
chi cuerrat pro s’eternidade.

Tando sos pensamentos,
sos sentimentos chi naschin dae su coro,
sun sonniu e bisos de lucore.

No intendes prus dolores,
sos chi turmentan sa bida,
mudandela in irroccu.

E su coro firmu
no brincat che issentidu
in cursas chi t’alluppina sa benas
e ti allagan su corpus de suore.

Solu sa mente sichit a pensare
e a bider sa terra, sos ch’istimas,
e si in bida at fattu solu bene
ti donat mazines d’incantu.

Cad’annu a sant’Andria,
cando su caente atunzinu
comintzat a si render a s’ierru,
as intender su nuscu de sos frores
e sas lacrimas de chie t’at istimadu.

(Inedita)

Inviata a Bore Marceddu Capidanne 2005 pro sa morte premidia de una rosa