Non so istracu ancora.

A sa muda beranu ses fuinde,
pijendedi sas mezus dies mias
chi ancora tenen briu, ca sun bias
cuddas primas bideas, sos intentos
ch’in mente ancora molian cuntentos
cretende chi sas penas sun fininde.

T’ammentas su suore, e sa matana
chi tando m’as pretesu, promitinde
chi paghe e annos mezus fis batinde,
bàrrios de promissas acansadas,
sas chi fin in s’isetu ammuntonadas
tratesas e frimmende a malagana.

Tue ischias comente fit s’annada
cando m’as fatu andare in sos caminos
garrigu ’e tribulias e pidinos
ue naes de frutos disizados,
fin tropu in altu pro esser tocados.
Carchi foza però l’apo furada.

Iseta, e unu pagu t’asselena,
lassa ti nelza chi no fit debadas,
non sun sicas sas fozas arribadas,
sun bildes, ma atzenden sos ammentos,
chi dan lughe e iscaldin cuddos bentos
chi m’inghirian fritos sa carena.

Acollas custas mias istajones,
ma non cretas chi lu tima s’atunzu,
e no m’as a intendere a murrunzu,
mancu in sos fritos malos de ijerru,
cando solu, timinde su disterru
chissà chi nde cumprenda sas rejones.

Trabagliu nou como mi ses dende,
chen’ischire puite ne comente,
mi truvas timerosu in mesu ’e zente,
a lis cantare custas bonas noas,
boghende a pizu sas debiles proas
ch’in coro m’as iscritu e sun giamende.

Bae beranu, bae in santa paghe,
e nara a chie m’est contende s’ora,
chi mi lasset, non sò istracu ancora
de custu umanu meu faghe-faghe…

Franco Piga (Romana ‘SS’)