Non semper
di Larentu Pusceddu

(A su massaju Oroteddesu)

Sos gallos tuos
an limadu e illisiadu
manicas intostadas
de farches e de tzappas
e sos manales
de s'aradu anticu.
Tue as bidu
totu sos arborinos
chi at partoridu
sa Natura
e sas ismurinadas
purpurinas o de tempesta.
E su sole
at carpidu e brusiadu
cun rajos de brasia via
su corpus tuo
chi che arvore nodosu
at resistidu
cun fortza de disisperu
a su tempus distruidore.
E su suore tuo
non semper s'est mudadu
in ranos dorados
de maduras ispicas.
E cando, a bortas,
custu s'est averadu,
furfurarzos ingordos
t'an furadu e distruidu
campos e laores
cun barbaru corazu.

(Segnalazione - "Meilogu" Puttumajore 1980)