Non cherzas esser mannu prim’ ‘e s’ora,
gòdidi cust’edad’ ‘e frioleras
chi oe t’est sa vida regalande;
issa t’est a sa cua abbaidande,
po ti sighire in dies passizeras.
Non tenzas presse, b’at tempus ancora.

Los bies cussos padros fioridos?
Tottus sos tuos sun, cun s’ermosura
de s’erba frisca e birde chi su ‘entu
carignat, troulàndesi cuntentu,
ninnande una lizera incrispadura
subra unu mar’ ‘e pàsidos sentidos.

Ossèrvalu su chelu… cant’est nettu!
Manc’una nue como b’at colande;
ch’est med’attesu ancora onzi tempesta.
E sun giogande, mira, tott’in festa,
sas rùndines ch’in altu sun bolande.
Non b’at ancora ‘enturzos in isettu.

In sas miradas tuas innotzentes
b’at un’àteru mundu disignadu,
tintu cun sos colores prus briosos;
regollechelu paris cun sos gosos,
non che lu lasses fuer, est peccadu;
t’at azuare in dies sufferentes.

L’intendes in su pettus cussu coro?
A bortas t’at a fagher tribulare;
ma non bi penses oe, ista serenu;
como chi solu ‘e bisos iss’est prenu,
a ube cheret lassachelu andare,
po ti mustrare dies tott’ ‘e oro.

Non tenzas presse, no, ponem’ in mente;
a ti che fagher mannu as a pensare
cando sa pitzinnia at a finire.
Ma tando, ch’in su mundu as a bessire,
ammèntadi sa vida ‘e affrontare
cun sa forza ‘e s’amore solamente.

As a bincher sa gherra
contr’a su tempus malu ch’as dananti.
Ma como gosa, innanti,
sas menzus ermosuras de sa terra.

_________________________________

Non aver fretta

Non voler crescere prima del tempo, / goditi quest’età delle frivolezze / che la vita ti sta oggi regalando; / essa ti osserva di nascosto, / per seguirti in giorni passeggeri. / Non aver fretta, c’è tempo ancora. //

Li vedi quei prati fioriti? / Son tutti tuoi, con l’immensa bellezza / dell’erba verde e fresca che il vento / accarezza, rotolandosi contento, / cullando una leggera increspatura / su un mare di sereni sentimenti. //

Guarda quel cielo… quant’è pulito! / Ora non passa neanche una nuvola; / son molto lontane ancora le tempeste. / E giocano, guarda, tutte in festa, / le rondini che volano in alto. / Non ci sono ancora avvoltoi in attesa. //

Negli sguardi tuoi innocenti / c’è un altro mondo disegnato, / dipinto con i colori più vivaci; / conservalo insieme alle gioie, / non lasciarlo scappare, sarebbe un peccato; / ti aiuterà nei giorni di sofferenza. //

Lo senti quel cuore nel petto? / A volte ti farà soffrire; / ma oggi non pensarci, stai sereno; / ora che è pieno solo di sogni, / lascialo andare dove vuole, / per mostrarti giorni tutti d’oro. //

Non aver fretta, no, dammi retta; / a diventare grande penserai / quando finirà la tua infanzia. / Ma allora, che uscirai nel mondo, / ricordati di affrontare la vita / solo con la forza dell’amore. //

Vincerai la guerra / contro il cattivo tempo che hai davanti. / Ma adesso godi, prima, / le meraviglie della terra. //