Non ti lu niet mai
di Larentu Pusceddu

Amicu caru
si dias resessire
a intrare in sos pensamentos suos,
sos prus secretos che sas raicrinas
prufundas de sa terra,
su disisperu ti diat,
che tronos in sas nues,
iscratzare su coro,
pro sa tzertesa chi non t'istimat prus.
Es menzus su dubiu.
Mantenelu che sienda,
aposidada in sas ruinas,
ca in su dubiu s'illusione campat:
s'illusione chi torrat sicuresa
cando custa a pacu a pacu si siccat
che luzana ludrosa a s'entu de mare.

Si at, issa, a foichinu ateru istintu
cun ater'omine o atera natura,
non ti lu niet mai.
Mantenzat su secretu!

La cheres a curtzu a tie
mancari non li lucan prus sos ocros
e non suspiret a sos basos tuos.
Tue l'istimas
peri in sa tristura
de ischire chi fortzis
non pensat prus a tie
e non t'at in su coro
che cando ades rucradu,
in zoventura, a manu tenta,
trainos fuliosos.

(Inedita)