Note bentosa
de Giuseppina Schirru

Ite note bentosa, custa note!
Giughet cantone' arcana dae atesu
e boghes lastimosas de richiamu.

Ite note bentosa, custa note!
No resesso a drommire:
sos canes a s'apedd'apedda
no la cheren finire; ite note!
Titirrìas in tota sa carena,
m'acurtzio a su balcone infriturida.

Ite note bentosa, custa notte!
A porteta isgantzida
abbaido asciuconada
s'iscurosa carrela, ite note!
Sa lughe de unu lampu tot'in d-una
isgiarit a sa lestra unu cuzone.

Ite note bentosa, custa note!
Intendo una 'oghe
intendo e... bido...
T'ido, o creo de t'aer bidu?
Ma custa 'oghe, emmo, già est sa tua.

Ite note bentosa, custa note
Mi ses giamende, opuru, goi mi paret?
Ite note! So tremende,
no poto ismentigare cuddos annos:
s'amore recumpensa fit de afannos
in su longu caminu umpar 'a tie.

Ite note bentosa, custa note
A betzesa,
umpare cun su 'entu, ses torradu?
O est sa conca mia
chi no t'at ismentigadu
e ti mantenet biu onzi momentu?
Ite note bentosa, custa note!

Menzione sezione veros libero al Premio di Poesia in Lingua Sarda Prantaferru di Paulilatino 12-06-2011