Sa luma frita penosa
d’esser ispozadu e trincia-tricia
de biddia frita: S’Aquila,
intro banos dudosos
in mes’a piuber’ e carrarzu:
tempus de mortos
ischidados da’ su digugliu
de cadenas naturales.

A vivere custrintos
in istrintorzos de tendas
est de s’ultima raighina
ruina de un’atera terra.
Oras chi mai che colant
columas de peleas non nadas
in sa mutria prus trevuca.

Como campusantu ebbia :
bi drommint sos biados!?
E inoghe acò sos restados
chi adorant su nudda
ue isperdisciaremi finas deo!
Ma manos chi no si bident
m’isfrijant mele-mele
a che mundare pessos tristos.

Sa note longa de inferru
m’azuat a che colare:
acò chizos de piantu,
iscasciadu su coro de assustu
e una nue manna manna
inchinghere mortos e bios,
liberasciones a s’imbesse,
e peristantu sas domos nde ruent
in dilliriu disfatas.
Note nemiga sen’avreschida,
né die liberadora!

Premio Speciale intitolato alla poetessa “Alda Merini” al "XI° Premio di Poesia Città di Iglesias 2009"