Notte d'Ómines
di Gonario Carta Brocca

In andala 'e mudine
de ispìritu d'ornine
de boidores mannos
e ràntzigos affannos
su tempus so' chirchande,
gramuzande
paràulas e pessos
in custa notte fritta
chei s'anima mia
isticchia
interi sos isteddos
chi lùghene che làgrimas de pratta
e falan dae s'atta
a custa terra 'e preda
perdida in d'unu sónniu
de lughe e de iscuru:
sónniu mannu de sorte
ue craitera est sa morte
e paret de intender una oghe
a nareju d'eternas povertades
e de disamistades
finidas in sa losa.
Sa luna essit pomposa
ponèndosi 'e fures su cuguttu
e sa notte
cumparit pius notte
e pius in dolu.
Una funtana
a bolu
cantat un'anninnia
a custa terra mia
de pupas aumbrada.
Pérdidu apo su tempus
in custu mundu 'e cosas virtuales
ue fémminas noàles
no hane prus sapore chei su 'inu brandu
chen'ardore;
chei custa vida mia
chi unu manzanu s'est istramudìa.

1° Premio "Concorso di Poesia e Prosa Costantino Longu" Bolotana 2002