Manos malaittas
de omines chena prus anima e coro,
in cust’amada terra nostra,
incantu e bellesa ant cherfidu brujare,
buscos e binzas, cuiles, livares antigos,
tottu in chisina,
sa natura umiliada,
iffusta solu dae lagrimas mudas.
Notte de fogu,
bentu tirannu, frammas e fumu,
dae cussos montes
fintzas a mare,
irferru, disisperu in donzi contone,
ite pena, sos animales fuinde,
che furiana, niedda e fea,
sa morte s’est iscampiada.
Manos malaittas
de omines chena prus anima e coro,
chin pagos disinnos marranos,
ant cherfidu tristos desertos,
in custu logu amenu,
chi eris fit gosu e ispantu,
armunia, colore, meravitza,
unu cantu melodiosu a sa vida.

Menzione d’onore al Concorso di poesia sarda “Luisa Monti” di Bosa - VIII Edizione 2019