Notte de Oscuridade
di Gianfranco Rosa

O notte de cumpleta oscuridade
chi as cuadu sa luna ei sos isteddos,
sos logos birdes los ammustras nieddos,
no s’ischit prus cal’est sa veridade.

Confusas sun sas boghes; sos faeddos
indistintos, de gherra o amistade;
in cust’ora no an diversidade
largos istradones o iscameddos.

O notte buggiosa de ispaventu
cantu m’ammentas su tempus presente
privu de lughe, senz’orientamentu.

S’egoismu e sa forza prepotente,
senz’unu lampu ‘e bonu sentimentu,
an imbuggiadu s’animu ‘e sa zente!