Notte Trista
di Gian Gavino Vasco

Cando a de notte calat su mudine,
su tempus puru paret s'ingalenet,
po pasare assunessi calch'iseutta.
In custu coro una candela allutta
mi faghet lughe; paret chi s'appenet
de cust'iscurigore chena fine.

E nudda mi cumparet, nudda 'io
dananti a custos ojos, chi perdinde
si sun in custu bòidu 'e sa vida.
Est cust'ànima trista, pispinnida,
mutas de dies pàsidas pedinde,
in isettu 'e sa lughe chi cherìo.

Ma no est su lamentu sou ebbia
a mi ponner in coro sa tristura,
in custa notte longa e istentosa;
ca murmuttande intendo, prantinosa,
una 'oghe chi contat s'amargura
de terras in turmentu 'e carestìa.

Boghes de disisperu mi nd'ischidan,
cando su primu sonnu m'est leande,
e bido, attesu, atzesa una lunera.
Boghes de zente, in chirca 'e calch'ispera,
chi m'intran in su coro, toccheddande,
e cust'ànimu istraccu non m'acchidan.

E ùrulos intendo de pitzinnos
chi pedin farfaruzas de consolu,
chena connoscher mancu sos disizos.
E mammas chi pranghinde sun sos fìzos,
mortos in cussas gherras chena dolu,
ube de paghe pèrdidos b'at sinnos.

E colo custu tempus fin'a cando
cussos primos lugores si presentan,
pintande in chelu un'àteru manzanu.
E s'Oriente miro, chittulanu,
e m'intendo ch'in coro si ch'assentan
isperas noas, ch'attesu che mando.

Ite trista chi ses, o notte mia,
ma cantu piùs trista est cussa zente,
chi donzi camba resu m'at dolente,
pedìndemi un'isper 'e amore ebbia.

Primo premio al Concorso di Poesia e Prosa Sarda di Santu Lussurgiu 2008