NOVAS DIES D’ISPERA
Di Lorenzo Brandinu

Ite silenziu in sas biddas dolentes
non bies umbra de pessone in giru
sun totu asserragliados in ritiru
beneighende sas oras chi passan
ponende fatu a timorias chi lassan
in pegnu arcanu bidas innossentes

sun mudos in garrela e gutureddos
sa farche mughit ranziga in s’aera
fuin sas bidas non lassan ispera
tra suspiros d’atesa e de tristura
mascherada sa zente pro pagura
nd’at cancelladu risos e faeddos

tremen sas ancas da su patimentu
finzas timende de bessire a fora
sonnian sa libertade a sa bonora
a gherra dogni die chin s’iscuru
senz’isperantzia de tempus futuru
che fozas sicas a bolu in su bentu

musicas mai intesas in su mundu
intonan che mortiferos signales
in sa lota perdente chin sos males
sun distrutos afetos e sentidos
tra fragos e colores mai bidos
chi a sas bidas li giran in tundu

mariposas nieddas sun in giru
moven a sa cuvada s’isvolatzan
nisciunu ischit inuve si piatzan
ca corpin e isparin a s’istante
nisciuna bida lis paret bastante
porrinde dolos e tocos d’ispiru

si pessos bonos faghene s’ispola
non lis lassan iscampu sas fiamas
de raighinas brujande sas tramas
cheren isperder custa zenia umana
sas bidas cando sonat sa campana
ventuladas che pazas in s’arzola

totuve est lutu totu est in piantu
e non b’at sole ch’iscaldet su bolu
ma fiorit s’ispera e su consolu
chi torren dies novas de incantu

Menzione concorso di Olbia 2020