Nudos che sa terra in Atunzu
di Larentu Pusceddu

Sas undas de su mare
murmuran carinnade sa terra
e ammentan a nois, amore,
sa die chi as prantu de felitzidade
cando t'at surcadu s'arbada.

Prudderos de abba in sos iscoglios
s'artzan pro ispiare a nois
surdos a su tempus istruidore
chi lestru che sa Tramuntana
colat e mai si firmat.
Est zelosu su bentu
de sa passione nostra
ca est mama de suspiros dilicados
chi daen undas a s'erba de prim'essida
e a sos frores profumados de Aprile.

Sas calas, sas virzines baddes,
sos montes e sos lagos prufundos
in tundu a nois, famidos e sisidos
de s'amore de su mundu intreu,
chircan sos carinnos lizeros
de sas manos de milli Brancallaos.

Nudos che sa terra in Atunzu, amore,
amus aradu e seminadu
sa vida chi de nois lassat ammentu.

(1° premiu - Nughedu S.N. 1978)