Nuraghe so, sos seculos isfido
di Celestino Caddeo

Nuraghe so, sos seculos isfido,
Cantu durat su mundu hap'a durare,
Costantemente assalidu mi bido
Da tempestas orrendas in sonare.

Ma mai m'hana potidu atterrare:
Osserva cantu in sos poderes fido.
Su tempus sigat puru a tempestare,
Tantu deo in contrariu decido.

Sighint eras e generaziones
A tramuntare, e deo in cust'istadu
Semper contando sas istasiones.

B'hat resone si deo paro fronte,
Ca sos mastros chi m'hana fabbricadu
Fint Piracmone, Isterope cun Bronte.