NURAGHES
Di Lorenzo Brandinu

Suspiros e lusingas a su bentu
ma a bortas mi paren oriolos
fatos da predas ladas e da tolos
inzenios de s'antica architetura
chi mantenen secreta sa natura
palpitande silentzios e fermentu

an isfidadu iverros e atonzos
predas sacras ifustas de sudore
chi pintana su sardu abitadore
chintas d’ispinas, isperas e rosas
de su limbazu nostru mariposas
de su misteru anticu, distimonzos

memorias iscritas in sa preda
pro durare in su tempus infinitu
temperadas a ferru e a granitu
sonnios antigos de artes segretas
an usadu maghias e retzetas
e intessidas a tramas de seda

dogni turre disvelat un abratzu
d’armonias arcanas e dolores
de sos nostros antigos genitores
essentzias de sa vera sardidade
in brama de orgogliu e libertade
nos ana tramandadu su limbatzu

turres originales e galanas
allineadas astros sole e luna
an de s’eternidade sa fortuna
sun de s’identidade raighinas
ch’isfidana sas furias divinas
e riden de sas tedias umanas

fortzieris chi tenen in s’iscuru
s’anima ‘e sardidade custodida
che misticas untanas de sa vida
ispiritu‘e Sardigna in su creadu
mantenene presente su passadu
e nos designan su tempus futuru

Menzione al concorso di Mamoiada Anno 2023